Чӑваш патшалӑх ҫамрӑксен театрӗнче Никита Бичурин ҫинчен спектакль хатӗрлени ҫинчен эпир унччен пӗлтернӗччӗ. Ҫав ӗҫӗн премьерипе чӳк уйӑхӗн 30-мӗшӗнче паллашма май килӗ.
Спектакльти тӗп сӑнар — Раҫҫее Китайпа паллаштарнӑ ӑсчах, Шупашкар районӗнчи Типнерте ҫуралнӑ Никита Бичурин.
Спектакле Чӑваш Республикин искусствӑсен тава тивӗҫлӗ ӗҫченӗн, писателӗн тата драматургӑн Николай Сидоровӑн «Ҫунатлӑ ҫамрӑклӑх» драми тӑрӑх хатӗрленӗ. Режиссёрӗ – Пушкӑртстан тата Тутарстан республикисен искусствӑсен тава тивӗҫлӗ ӗҫченӗ Байрас Ибрагимов. Художник-постановщикӗ – Татарстан Республикин искусствӑсен тава тивӗҫлӗ ӗҫченӗ Булат Ибрагимов, тумсене Чӑваш Республикин культурӑн тава тивӗҫлӗ ӗҫченӗ Лариса Комиссарова хатӗрленӗ. Музыки — Чӑваш Республикин искусствӑсен тава тивӗҫлӗ ӗҫченӗн Лолита Чекушкинан, хореографийӗ – Андрей Петровӑн.
Чӳк уйӑхӗн 21-мӗшӗнче Шупашкар муниципаллӑ округӗнчи аптекӑна Россельхознадзорӑн Чаваш Енри тата Чемпӗр облаҫӗнчи управленийӗ тӗрӗсленӗ те йӗркене пӑснине палӑртнӑ.
Аптека кӳршӗ ҫурта куҫнӑ иккен. Унӑн адресӗ урӑхла пулнӑ. Ведомство специалисчӗсем палӑртнӑ тӑрӑх, ҫӗнӗ вырӑнта аптека лизензировани процедури витӗр тухман, ҫавна май вӑл лицензисен реестрӗнче ҫук.
Ведомство усламҫа лицензие улшӑнусем кӗртиччен ветпрепаратсене сутмашкӑн чарӑнма ыйтнӑ.
Шупашкар муниципаллӑ округӗнчи Йӑршу ялӗнче пушар пулнӑ. Унта ялти клуб ҫунма пуҫланӑ.
Инкеклӗ лару-тӑру министерстви пӗлтернӗ тӑрӑх, ҫулӑм чӳк уйӑхӗн 25-мӗшӗнче 22 сехет те 10 минутра тухнӑ. Вӑл 1936 ҫулта хута янӑ клуба ярса илнӗ. Йывӑҫ ҫуртӑн тӑрри, шалти пайӗ ҫунса кайнӑ. Вулавӑшӑн шалти отделки те сиенленнӗ.
Пушарнӑйсем ҫулӑма пӗр сехетрен сӳнтернӗ. Халӗ ҫулӑм ӑҫтан тухнине тӗпчеҫҫӗ.
Шупашкар муниципалллӑ округӗнчи Кӳкеҫре ҫак кунсенче шкул ҫуртне ҫине тӑрса хӑпартаҫҫӗ. Ӑна кирпӗчрен купаласа. Кирпӗч хуракансем сивӗре те, ҫил-тӑманта та ӗҫлеҫҫӗ. Ирех ӗҫе кӳлӗнсе каҫченех тӑрмашаҫҫӗ вӗсем. Электричество ҫутипе те вӑй хураҫҫӗ.
Район центрӗнчи виҫҫӗмӗш шкул пулмалли ҫурта епле хӑпартнипе ҫак эрнере вырӑнти тӳре-шара паллашнӑ.
Шкул 825 ача вӗренмелӗх пулӗ. Ӑна «Регионжилстрой» компани хӑпартать. Строительствӑра 120 ытла ҫын тӑрӑшать. Шкула 2024 ҫулта туса пӗтермелле.
Чӳк уйӑхӗн 26-мӗшӗнче Чӑваш тӗррин кунне уявланӑ май тӗрлӗ ҫӗрте тӗрлӗ мероприяти ирттереҫҫӗ.
Шупашкар муниципаллӑ округӗнчи Ишлейри ял вулавӑшӗнче авалхи чӑваш тумӗсене кӑтартнӑ. Вӗсене Роза Карикова Римма Сорокина кӑтартнӑ.
Римма Леонидовна (сӑнӳкерчӗкре сылтӑм енче) валли чӑваш кӗпине 1983 году амӑшӗ, Вера Волкова, ҫӗлесе панӑ. Вера Прокопьевна тумӗпе Римма Леонидовна хӑйӗн туйӗн иккӗмӗш кунӗнче ҫынсен умне тухнӑ.
Роза Карикова (сӑнӳкерчӗкре сулахай енчи) ҫипуҫне те амӑшӗ, Фёкла Яковлевна, хатӗрлесе панӑ. Ку вӑл 1955 ҫулта пулнӑ.
Юлашки вӑхӑтра Раҫҫейре коклюш чирӗ сарӑлма пуҫланӑ. Роспотребнадзор кунашкал чире Чӗлепи тата Томск облаҫӗсенче, Питӗрте тата Тутарстанра тупса палӑртнине ҫирӗплетет. Чӑваш Енре те тӗслӗхсем пур. Гигиена тата эпидемиологи центрӗ пӗлтернӗ тӑрӑх, республикӑра юлашки 10 уйӑхра 46 ҫын коклюшпа чирленӗ. Ку ытти ҫулти вӑтам кӑтартуран 3 хут пысӑкрах.
Комсомольски, Шупашкар, Муркаш, Шӑмӑршӑ, Етӗрне муниципаллӑ округӗсенче пӗрер тӗслӗхе ҫирӗплетнӗ, Ҫӗнӗ Шупашкарта - 10, Шупашкарта 27 тӗслӗхе. Улатӑрта тата Канашра икӗ ҫын чирленӗ.
Шӑматкун каҫхине Шупашкар муниципаллӑ округӗнчи Олкаш ялӗнче пушар пулнӑ. Ҫуртӑн тӑрри тата веранда ҫунса кайнӑ. Ҫӑлавҫӑсем пушарпа 40 минут кӗрешнӗ. 67 ҫулти кил хуҫи инкек вӑхӑтӗнче сӗрӗмпе наркӑмӑшланса вилнӗ.
Ҫав кунах Етӗрне муниципаллӑ округӗнчи Советское ялӗнче 72 ҫулти арҫыннӑн хуҫалӑхӗнче пушар тухнӑ. Ҫулӑм ҫуртӑн пӗр пайне сиенлетнӗ.
Паян, чӳк уйӑхӗн 20-мӗшӗнче, Хӗрлӗ Чутайӗнчи культура ҫуртӗнче театр коллективӗсен республикӑри «Асамлӑ чаршав» IV-мӗш фестивалӗн гала-концерчӗ пулӗ.
Шупашкар муниципаллӑ округӗнчи Апашри халӑх театрӗн артисчӗ Владислав Кириллов (режиссёрӗ — Ольга Ерилеева) халӑх тетелӗнчи хӑйӗн страницинче пӗлтернӗ тӑрӑх, фестивале Хӗрлӗ Чутай муниципалитет округӗнче ҫуралса ӳснӗ, Чӑваш патшалӑх академи драма театрӗн актерӗсене Ирина Садовниковӑпа Николай Булаткина халалланӑ.
СССР халӑх артисчӗ Борис Алексеев ячӗллӗ Апаш халӑх театрӗ ҫав фестивале А. Ахверина ҫырнӑ «Калуш кайрӗ Атӑла» пьесипе лартнӑ спектакльпе хутшӑнӗ.
Мероприяти 18 сехетре пуҫланӗ.
Россельхознадзорӑн регионти управленийӗн ӗҫченӗсем Шупашкар муниципаллӑ округӗнчи Ҫатракасси ҫывӑхӗнче свалка тупнӑ. Унта бетон, шифер, бетон люкӑн ункисем, машина покрышкисем, йывӑҫ-тӗм турачӗсем йӑванса выртаҫҫӗ. Пӗтӗмпе – 50 тӑваткал метр ҫинче.
Ведомство ҫак ҫӗр лаптӑкӗ хуҫи тӗлӗшпе представлени ҫырнӑ, ҫӳп-ҫап купине пӗтерме ыйтнӑ. Вӑл ҫунма пуҫлас тӑк ял умӗнче те хӑрушлӑх тухса тӑрать.
Ҫӗре тара илнӗ ҫын ведомствӑна ҫӳп-ҫапа ҫӗр шӑннӑ хыҫҫӑн 30 кунра тасатса пӗтерме шантарнӑ.
Шупашкар муниципаллӑ округӗнче 29 ҫулти хӗрарӑма «Лиза Алерт» хастарӗсем виҫӗ кун шыранӑ. Тӑванӗсем вӑл ӑҫта пулнине чӳк уйӑхӗн 12-мӗшӗнченпе пӗлмен.
Хӗрарӑма тупнӑ. Анчах, шел те, унӑн виллине. Кун пирки отряд хастарӗсем хӑйсен сайтӗнче хыпарланӑ. "Тупӑннӑ. Вилнӗ. Тӑванӗсемпе пӗрле хурланатпӑр", - тесе ҫырнӑ сайтра ӗнер 15 сехет иртсен.
+1.0 °C